Play Misty for Me (1971)

ഈസ്റ്റ്‌വുഡ്  സംവിധാനത്തിലേക്ക്  കാലെടുത്തു  വെച്ച  ചിത്രമായിരുന്നു  പ്ലേ  മിസ്റ്റി  ഫോര്‍ മി . കാലത്തിനു  മുന്‍പ്  സഞ്ചരിച്ച  ഈ ചിത്രം  പിന്നീട്  ഒരു  സബ് ജോണറിന്റെ പിറവിക്കു  തന്നെ  കാരണമായി . ഫാറ്റല്‍ അട്ട്രാക്ഷന്‍  പോലെയുള്ള  എണ്ണമറ്റ  ചിത്രങ്ങള്‍  ഈ  ഈസ്റ്റ്‌വുഡ്  ചിത്രത്തിന്റെ  പാത പിന്തുടര്‍ന്നാണ്  വന്നത് .

പ്രശസ്ത  റേഡിയോ ജോക്കി  ഡേവ് ഗാര്‍വര്‍  (ക്ലിന്റ്  ഈസ്റ്റ്‌വുഡ് ) ഒരു  ബാറില്‍  വെച്ചാണ്‌  ആദ്യമായി  എവെലിന്‍ ഡ്രാപറിനെ (ജെസിക്ക വാള്‍ട്ടര്‍ ) കണ്ടു മുട്ടിയത് . ഡേവിന്റെ  നമ്പര്‍ വണ്‍ ഫാനാണെന്ന്  സ്വയം  പരിചയപ്പെടുത്തുന്ന എവെലിന്‍ ഈ കൂടിക്കാഴ്ച  അവിചാരിതമായിട്ടല്ല  എന്നും  പറയുന്നു .  സ്വന്തം  വീട്ടിലേക്കു  എവെലിനെ ക്ഷണിക്കുമ്പോള്‍  ഒരു  രാത്രിയില്‍  കൂടുതല്‍  ബന്ധമൊന്നും  ഡേവ്  പ്രതീക്ഷിച്ചിരുന്നില്ല . എന്നാല്‍  എവെലിന്‍  പതിയെ  'ബോര്‍ഡര്‍ ലൈന്‍  പേഴ്സണാലിറ്റി ഡിസോര്‍ഡറി'ന്റെ  ലക്ഷണങ്ങള്‍  കാണിച്ചു  തുടങ്ങുന്നു(  അമിതമായ  ഒബ്സെഷന്‍ ,വാശി ,അനിയന്ത്രിതമായ വികാര പ്രകടനം ,ആത്മഹത്യാ ടെന്റന്‍സി  മുതലായവ  ഇത്തരക്കാരില്‍  കണ്ടു  വരുന്നു )   .ഗിഫ്റ്റുകള്‍  അയച്ചും സര്‍പ്രൈസ്  വിസിറ്റുകള്‍  നല്‍കിയും  തന്നെ  വിടാതെ  പിന്തുടരുന്ന എവെലിന്‍  വൈകാതെ തന്നെ   ഡേവിന് ഒരു ശല്യമായി  മാറുന്നു . ഡേവിന്റെ  പൂര്‍വ  കാമുകി  ഡേവിന്റെ ജീവിതത്തിലേക്ക്  കടന്നു  വരുന്നതോടെ  പ്രശ്നം കൂടുതല്‍  സങ്കീര്‍ണമാകുന്നു . 

 ഒരു നല്ല   സൈക്കൊലോജിക്കല്‍ ചിത്രമാണ്‌  പ്ലേ മിസ്റ്റി  ഫോര്‍  മി .. സംവിധായകന്‍  എന്ന നിലയില്‍  ആദ്യത്തെ  ചിത്രം  വളരെ  നല്ല  രീതിയില്‍  തന്നെ  ചെയ്തിട്ടുണ്ട്  ഈസ്റ്റ്‌വുഡ് .ഇടയ്ക്കു  ചില  ലോങ്ങ്‌  ഷോട്ടുകളുടെ ധാരളിത്യവും ചില  അനാവശ്യ  രംഗങ്ങളും  തുടക്കക്കാരന്റെ   പോരായ്മകളായി  വേണമെങ്കില്‍  കണക്കാക്കാം . ഡേവ്  ഗാര്‍പര്‍  ആയി  പുള്ളി  നല്ല  പ്രകടനം  കാഴ്ച  വെച്ചിട്ടുണ്ട്  . സുഹൃത്തും മെന്ററും ആയ  സംവിധായകന്‍  ഡോണ്‍ സീഗളിനു ചെറിയ  ഒരു  വേഷം  കൊടുക്കാനും  ഈസ്റ്റ്‌വുഡ്  മറന്നില്ല . ജെസീക്ക വാള്‍ട്ടര്‍  ആണ്  എവെലിനെ  അവതരിപ്പിച്ചത്  ..നിമിഷങ്ങള്‍  കൊണ്ട്  സ്വഭാവം  മാറുന്ന എവിലിന്‍  ആയി  ജെസ്സിക  അസാധാരണ  പ്രകടനമായിരുന്നു . 

ഈ  ഫിലിം  ഇറങ്ങി  നാല്‍പ്പതിലധികം  വര്‍ഷങ്ങള്‍ക്കിടയില്‍  ഇതേ  തീമില്‍  ഒരുപാടു  ത്രില്ലെര്‍സ്  ഉണ്ടായത് ചിലപ്പോള്‍  ഒറിജിനലിന്റെ  ആസ്വാദനത്തെ  ബാധിച്ചേക്കാം ..എങ്കിലും  ഒരു തവണ  കണ്ടാല്‍  ഓര്‍മയില്‍  നില്‍ക്കുന്ന  ഒരു  നല്ല  ത്രില്ലെര്‍  ആണ്  പ്ലേ  മിസ്റ്റി  ഫോര്‍  മി . 

IMDB : 7/10

RT : 83%

The Bridges of Madison County (1995)

ഹോളിവൂഡിലെ  എക്കാലത്തെയും  മികച്ച  പ്രണയ  ചിത്രങ്ങളില്‍  ഒന്ന് .

അമ്മയുടെ മരണത്തോടനുബന്ധിച്ചു അയോവയില്‍ എത്തിയതാണ് മൈക്കളും സഹോദരി കരോളിനും . അമ്മ ഫ്രാന്‍സെസ്ക ജോണ്‍സണ്‍ വില്‍പത്രത്തോടൊപ്പം ചില രഹസ്യങ്ങളും മക്കള്‍ക്കായി കാത്ത് വെച്ചിട്ടുണ്ടായിരുന്നു . തന്റെ ജഡം ദഹിപ്പിച്ചു തൊട്ടടുത്ത റോസ്മന്‍ ബ്രിഡ്ജില്‍ നിന്നും ചാരം ഒഴുക്കണമെന്നായിരുന്നു ആദ്യ നിര്‍ദേശം. ആദ്യ നിര്‍ദേശത്തിന്റെ ഷോക്ക് മാറുന്നതിനു മുന്‍പേ തന്നെ ,വില്പത്രത്തോടൊപ്പം ലഭിച്ച താക്കോല്‍ അവര്‍ക്ക് മുന്നില്‍ ഒരു ചോദ്യ ചിഹ്നമായി അവശേഷിച്ചു . .താക്കോലിന്റെ ഉറവിടം തേടിയപ്പോള്‍ കിട്ടിയ ബോക്സില്‍ അവരെ കാത്തിരുന്നത് ഒരു കൂട്ടം കത്തുകളും ഡയറികളും പിന്നെ കുറെ ക്യാമറകളും ആയിരുന്നു .കത്തില്‍ നിന്നും റോബര്‍ട്ട് എന്നൊരാളുമായി ഫ്രാന്‍സെസ്കക്ക് റിലേഷന്‍ ഉണ്ടായിരുന്നെന്ന് അവര്‍ക്ക് മനസ്സിലാകുന്നു . 
1965 ഇലേക്ക് ചിത്രം നമ്മളെ കൊണ്ട് പോകുന്നു . മൈക്കളിനു 18 ഉം കരോളിനു 16 ഉം പ്രായമുള്ള സമയം .40ഇന്റെ പകുതിയില്‍ എത്തിനില്‍ക്കുന്ന ഫ്രാന്‍സെസ്ക ഭര്‍ത്താവു റിച്ചാര്‍ഡിനും മക്കള്‍ക്കും ഭക്ഷണമൊരുക്കുന്നതിന്റെ തിരക്കില്‍ ആണ് .അവരോടൊപ്പം ഇരിക്കുമ്പോഴും ഫ്രാന്‍സെസ്ക ഏകാന്തത അനുഭവിക്കുന്നുണ്ട് . ഇല്ലിനോയ്സിലേക്ക് അഞ്ചു ദിവസത്തെ യാത്ര തിരിക്കുകയാണ് റിച്ചാര്‍ഡും മക്കളും .ആദ്യദിനം പതിവ് പോലെ വീട്ടു ജോലികളില്‍ ഏര്‍പ്പെട്ടിരിക്കുമ്പോഴാണ് റോസ്മന്‍ ബ്രിഡ്ജിലേക്ക് വഴി ചോദിച്ചു കൊണ്ട് ഒരൂ കാര്‍ അവിടെ നിര്‍ത്തിയത് . കാറില്‍ നിന്നും ഇറങ്ങിയ ആള്‍ റോബര്‍ട്ട്‌ ആണ് പേരെന്നും നാഷണല്‍ ജ്യോഗ്രഫിക് ഫോട്ടോഗ്രാഫര്‍ ആണെന്നും സ്വയം പരിചയപ്പെടുത്തുന്നു .വഴി പറഞ്ഞു കൊടുക്കാന്‍ ബുദ്ധിമുട്ടുന്ന ഫ്രാന്‍സെസ്ക ഒടുക്കം നേരിട്ട് കാണിച്ചു കൊടുക്കാന്‍ റോബര്‍ട്ടിന്റെയൊപ്പം യാത്ര തിരിക്കുന്നു . കുറഞ്ഞ നേരം കൊണ്ട് തന്നെ ഫ്രാന്‍സെസ്കയും റോബര്‍ട്ടും അടുക്കുന്നു .
ഡയറി കുറിപ്പുകളിലൂടെ തങ്ങള്‍ക്കിത് വരെ പരിചയമില്ലാത്ത അമ്മയെ അറിയുക ആയിരുന്നു മൈക്കളും കരോളിനും .
.ബ്രിഡ്ജസ് ഓഫ് മാഡിസണ്‍ കൌണ്ടി എന്ന് തന്നെ പേരുള്ള ബെസ്റ്റ് സെല്ലെര്‍ നോവലിന്റെ ചലച്ചിത്രവിഷ്ക്കാരം ആണ് ഈ ഫിലിം .
മെറില്‍ സ്ട്രീപ് ആണ് ചിത്രത്തില്‍ ഫ്രാന്സേസ്കയെ അവതരിപ്പിച്ചത് .46 ആം വയസ്സിലും അതീവ സുന്ദരിയായ ഇവര്‍ മനോഹര പ്രകടനമായിരുന്നു ചിത്രത്തില്‍ . .
റഫ് ആന്‍ഡ്‌ ടഫ് കഥാപാത്രങ്ങളില്‍ നിന്നെല്ലാം വ്യത്യസ്തനായി ഒരു റൊമാന്റിക് ഫോട്ടോഗ്രാഫര്‍ ആയി ഈസ്റ്റ്‌വുഡ് വീണ്ടും അതിശയിപ്പിച്ചു .കോരിച്ചൊരിയുന്ന മഴയത് ഫ്രാന്സേസ്കയെ നോക്കി നിക്കുന്ന റോബര്‍ട്ട്‌ മനസ്സില്‍ ഒരിക്കലും മായാത്ത കാഴ്ചയാണ് . റോബര്‍ട്ടിനെ പോലെ സെന്‍സിറ്റീവ് ആയ ഒരു കഥാപാത്രം ഈസ്റ്റ്‌വുഡ് അവതരിപ്പിക്കുമെന്ന് ആരും പ്രതീക്ഷിച്ചു കാണില്ല . ക്ലിന്റ് ഈസ്റ്റ്‌വുഡ് എന്ന മികച്ച ഡയറക്ടറുടെ മാന്ത്രിക സ്പര്‍ശം ചിത്രത്തിലുടനീളം ഉണ്ട് .മനോഹരമായ ,വളരെ പക്വതയാര്‍ന്ന ഒരു റൊമാന്റിക്‌ ചിത്രമാണ്‌ ബ്രിഡ്ജസ് ഓഫ് മാഡിസണ്‍ കൌണ്ടി. നല്ലൊരനുഭവമായിരിക്കും തീര്‍ച്ച .
IMDB : 7.5/10
RT : 89 %

Escape from Alcatraz (1979)

'Break the rules and you go to prison .Break the prison rules and you go to Alcatraz'

എക്കാലത്തെയും  മികച്ച  പ്രിസണ്‍  ചിത്രങ്ങളില്‍  ഒന്നാണ്  എസ്കേപ്  ഫ്രം അല്‍ക്കട്രാസ് . ദ ഷോഷാങ്ക് റിഡംപ്ഷന്‍ ,കൂള്‍ ഹാന്‍ഡ്‌ ലൂക്ക് ,ഗ്രേറ്റ്‌ എസ്കേപ് തുടങ്ങിയ  പ്രിസണ്‍  ബ്രേക്ക്‌ ചിത്രങ്ങളുടെ  കൂട്ടത്തില്‍ ചേര്‍ക്കാവുന്ന ഒന്നാണ്  ഈ ഈസ്റ്റ്‌വുഡ് ചിത്രവും .

ബയോഗ്രഫി  വിഭാഗത്തില്‍  പെടുത്താവുന്ന  ഈ ചിത്രം അല്‍ക്കട്രാസ് എന്ന മാക്സിമം  സെക്യൂരിറ്റി  പ്രിസണ്‍ കേന്ദ്രീകരിച്ചാണ് കഥ  നടക്കുന്നത് .സാധാ  ജയിലില്‍ അധിവസിപ്പിക്കാന്‍ ബുദ്ധിമുട്ടുള്ള ജയില്‍ പുള്ളികളാണ്.സാധാരണ അല്‍ക്കട്രാസില്‍  എത്തിചേരാറുള്ളത് .  തടവ്‌പുള്ളികളോട്   മാനുഷിക പരിഗണന കാണിക്കാറുമില്ല ഇവിടെ.

1960 ജനുവരി 18 നാണു ഫ്രാങ്ക് മോറിസ് (ക്ലിന്റ് ഈസ്റ്റ്‌വുഡ് ) അല്‍ക്കട്രാസില്‍ എത്തുന്നത് . ഇതിനുമുന്‍പുള്ള  ജയിലുകളില്‍  നിന്നെല്ലാം   ജയില്‍ ചാടിയത്  മൂലം  ആണ്  മോറിസ്  ഇവിടെയെത്തിയത് .വന്ന  ഉടനെ തന്നെ  വാര്‍ഡന്‍ മോറിസിനെ വിളിപ്പിച്ചു  അല്‍ക്കട്രാസില്‍  നിന്നും  ജയില്‍  ചാടുന്നത്  അസാധ്യമാണെന്ന് ബോധ്യപ്പെടുത്തുന്നു .ചുരുങ്ങിയ  ദിവസങ്ങള്‍  കൊണ്ട്  തന്നെ  മോറിസിന്  ജയിലില്‍  ശത്രുക്കളും  മിത്രങ്ങളും  ഉണ്ടായി . ചിത്രകാരനായ  ഡോക് ,കറുത്ത വര്‍ഗക്കാരനായ 'ഇംഗ്ലീഷ്' , ലിറ്റ്മസ് തുടങ്ങിയവര്‍  ജയിലില്‍  വന്ന  നാളുകളില്‍  മോറിസിന്  സപ്പോര്‍ട്ട്  ആയിട്ടുണ്ടായിരുന്നു . തൊട്ടടുത്ത  സെല്ലിലുള്ള  ചാര്‍ളി ബട്ട്സുമായും മോറിസ്  സൌഹൃദം  സ്ഥാപിക്കുന്നു ..പിന്നീട്  തന്റെ  പഴയ  സുഹൃത്തുക്കളായ  ജോണും  ക്ലിയറന്‍സും  അല്‍ക്കട്രാസില്‍  എത്തുന്നതോടെ  ജയില്‍  ചാടുന്നതിനെ  കുറിച്ച്  മോറിസ്  ചിന്തിക്കാന്‍  തുടങ്ങുന്നു ..ജയില്‍ കെട്ടിടം  കടക്കുക  എന്നതാണ്  ആദ്യ  കടമ്പ .വെന്റിലേഷന്‍ വഴി  ആണ്  അകെ  ഉള്ള  ഒരു വഴി . അതിനു  പക്ഷെ  ഒരു  മെറ്റല്‍  പീസ്‌  പോലും  ജയില്‍  പുള്ളികളുടെ  കൈവശം  എത്തതിരിക്കാന്‍  ജയില്‍ അധികൃതര്‍ ശ്രദ്ധിച്ചിരുന്നു . ഇനി  ജയില്‍  കെട്ടിടം  കടന്നാലും  അതിലും  വലിയ  കടമ്പ  മൈലുകള്‍ നീണ്ടു  കടക്കുന്ന  സമുദ്രം  നീന്തി  കടക്കണം  എന്നാണ് .മോറിസും സംഘവും പക്ഷെ  ജയില്‍  ചാടാന്‍ തന്നെ  തീരുമാനിക്കുന്നു 

. പിന്നീട്  ത്രസിപ്പിക്കുന്ന  നിമിഷങ്ങളിലൂടെയാണ് ചിത്രം  സഞ്ചരിക്കുന്നത് .

[താഴെയുള്ള  വരികളില്‍  സ്പോയ്ലെര്‍സ് അടങ്ങിയിട്ടുണ്ട് ]

അമേരിക്കയിലെ അല്‍ക്കട്രാസ് ദീപില്‍ സ്ഥിതി  ചെയ്തിരുന്ന  ഭീകരജയിലെ  പീഡന  കഥകള്‍  ഒരുപാടുണ്ട് . അല്‍ക്കട്രാസില്‍  നിന്ന്  ഒരാളും  രക്ഷപ്പെടില്ല  എന്ന ജയില്‍  അധികൃതരുടെ വാടാതെ  വെല്ലു   വിളിച്ചു  ജയില്‍  ചാടാന്‍  ശ്രമിച്ച  മൂന്നു  പേരുടെ  കഥയാണ്  ഈ ഡോണ്‍  സീഗള്‍ ചിത്രം ..ഈസ്റ്റ്‌വുഡ്  ആണ്  ചിത്രത്തിന്റെ  മുഖ്യ  ആകര്‍ഷണം ..അസാധാരണ  I.Q ലെവലുള്ള  ഫ്രാങ്ക്  മോറിസ്  ആയി  ഈസ്റ്റ്‌വുഡ്  ശ്രദ്ധേയ  പ്രകടനം  കാഴ്ച  വെച്ചിട്ടുണ്ട് .  

39  പേരാണ്  അല്‍ക്കട്രാസ്പ്രിസണില്‍  നിന്നും  രക്ഷപെടാന്‍  ശ്രമിച്ചത്  .ഇതില്‍  മുപ്പത്താറ്  പേര്‍ മുങ്ങി  മരണ പ്പെടുകയോ  പിടിക്കപെടുകയോ  ചെയ്തിട്ടുണ്ട് .. മോറിസ്  അടങ്ങുന്ന  മൂവര്‍സംഘത്തിനു  എന്ത്  പറ്റിയെന്നു  ആര്‍ക്കും  അറിയില്ല .മുങ്ങി  മരിചിട്ടുണ്ടാകും  എന്ന്  വാദിച്ച  ജയില്‍  അധികൃതര്‍ക്ക്  പക്ഷെ  ഒരു  ഡെഡ്ബോഡി  പോലും  കണ്ടു കിട്ടാന്‍  സാധിച്ചിട്ടില്ല . പിന്നീട്  അല്‍ക്കട്രാസ്ജയില്‍  അടച്ചു  പൂട്ടുകയും  ഇവിടം  വിനോദ സഞ്ചാര  കേന്ദ്രമാക്കിയതിലും മോറിസിന്  ചെറുതല്ലാത്ത  പങ്കുണ്ട് .

ശ്വാസമടക്കി  പിടിച്ചു  കാണേണ്ട  ഒരു മികച്ച  ചിത്രമാണ്‌  എസ്കേപ് ഫ്രം അല്‍ക്കട്രാസ്.

IMDB :7.6/10

RT : 95%

Pale Rider(1985)

വീണ്ടുമൊരു  വെസ്റ്റേണ്‍  വീരഗാഥ .

"അപ്പോള്‍ ഒരു വിളറിയ കുതിര വരുന്നതു ഞാന്‍ കണ്ടു. അതിന്‍റെ മേല്‍ യാത്ര ചെയ്തിരുന്നവനെ മരണമെന്ന് വിളിച്ചിരുന്നു.പാതാളം അയാളെ അനുഗമിച്ചിരുന്നു". 

ബൈബിളിലെ ഈ  വരികളാണ്  P ale Rider എന്ന പേരിന്റെ ഉറവിടം  . ഈസ്റ്റ്‌വുഡ്  അവസാനമായിട്ടു  അവതരിപ്പിച്ച  നിഗൂഡതകള്‍  നിറഞ്ഞ  അപരിചിതകഥാപാത്രം  ഈ  ചിത്രത്തിലായിരുന്നു . ഈസ്റ്റ്‌വുഡിന്റെ  തന്നെ  മറ്റൊരു  ചിത്രമായ  High Plains Drifter ഇനെ  ഓര്‍മിപ്പിച്ചു  കൊണ്ടാണ്  ചിത്രം  തുടങ്ങുന്നത് . 

കാലിഫോര്‍ണിയയിലെ സങ്കല്‍പ്പിക  നഗരമായ  ലഹൂദ് ന്റെ  പ്രാന്തപ്രദേശങ്ങളെ ചുറ്റിപറ്റിയാണ്  ചിത്രം  കഥ പറയുന്നത് . ലഹൂദിലെ മൈനിംഗ്  ഫാക്ടറി  ഉടമയായ കോയ് ലഹൂദ് ഖനനതൊഴിലാളികള്‍ അധിവസിക്കുന്ന കാര്‍ബണ്‍ കാന്യന്‍ ഒഴിപ്പിക്കാന്‍  തന്റെ  ഗുണ്ടാപടകളെ  ഏര്‍പ്പെടുത്തുന്നു .ക്യാമ്പുകളില്‍  നാശം വിതച്ച അക്രമികള്‍  പതിനാല്  വയസ്സുകാരി  മേഗന്‍  വളര്‍ത്തുന്ന  നായക്കുട്ടിയെയും  കൊല്ലുന്നു .വനത്തില്‍ നായയുടെ  ജഡം  കുഴിച്ചിടുന്ന  മേഗന്‍ ഒരു മിറാക്കിളിനായി പ്രാര്‍ത്ഥിക്കുന്നു .എങ്ങു  നിന്നോ  ഒരു  അപരിചിതന്‍ കുതിരപ്പുറത്തേറി  വരുന്നതാണ്  പിന്നീട്  നമ്മള്‍  കാണുന്നത് .

അവശ്യ സപ്ലൈ തീര്‍ന്നതിനാല്‍ തൊഴിലാളികളുടെ  നേതാവായ  ഹള്‍ ബാരെറ്റ് ടൌണിലേക്ക്  പോകാന്‍  നിര്‍ബന്ധിതനാകുന്നു . ടൌണിലെത്തിയ  ബാരെറ്റിനെ ഗുണ്ടകള്‍ ആക്രമിക്കുന്നു .എന്നാല്‍ നേരത്തെ  കാണിച്ച  അപരിചിതന്‍  ബാരെറ്റിനെ  രക്ഷിക്കുന്നു . ജീവന്‍  രക്ഷിച്ച  ആളെ  ബാരെറ്റ്  തന്റെ  വീട്ടിലേക്കു  ക്ഷണിക്കുന്നു .  മേഗന്റെ  അമ്മ  വിധവയായ  സാറയോടോത്താണ്  ബരെറ്റ്  ജീവിക്കുന്നത് . അപരിചിതനെ  വീട്ടില്‍  കൊണ്ട്  വന്നതില്‍ സാറ   നീരസം  പ്രകടിപ്പിക്കുന്നു . എന്നാല്‍  പുരോഹിതന്മാര്‍  ധരിക്കുന്ന കോളര്‍  ധരിച്ചു  ഭക്ഷണമുണ്ണാന്‍  എത്തിയ  അപരിചിതനെ  കണ്ടു  എല്ലാവരും  അമ്പരക്കുന്നു .വളരെ  പെട്ടെന്ന് തന്നെ  'പ്രീചെര്‍'   സ്ഥലത്തെ തൊഴിലാളികള്‍ക്ക് പ്രിയപ്പെട്ട ആളായി മാറുന്നു .കോയ് ലഹൂദിന്റെ മകനെയും  കൂട്ടളിയേം പ്രീചര്‍ വിരട്ടിയോടിച്ച  സംഭവം , മൈനിംഗ്  ഫാക്ടറിക്കെതിരെ  പോരാടാന്‍ ഗ്രാമവാസികള്‍ക്ക്‌ പ്രചോദനമാകുന്നു     സ്ഥലത്തില്ലതിരുന്ന  കൊയ്  ലഹൂദ്  തിരിച്ചെത്തിയപ്പോള്‍ പ്രീച്ചറെ  കുറിച്ചുള്ള  കഥകള്‍ ആയിരുന്നു  കാത്തിരുന്നത് .  പ്രീച്ചറെ  കൈകാര്യം  ചെയ്യാനും സ്ഥലം  ഒഴിപ്പിക്കാനുമായി  കൊയ് ലഹൂദ് ,    സ്റോക്ക്ബര്‍ണ്‍   എന്ന  മാര്‍ഷലിനെ ഏര്‍പ്പാടാക്കുന്നു .

ഈസ്റ്റ്‌വുഡ്  സംവിധായകനായും നടനായും  ഒരിക്കല്‍  കൂടി  കയ്യടി  നേടിയ  ചിത്രമായിരുന്നു  Pale Rider .ചിത്രം  ഇടക്കെപ്പോഴൊക്കെയോ മലയാളം ഫിലിം  ഫാന്റത്തെ  ഓര്‍മിപ്പിച്ചു   .ആറു  ഡെപ്യൂട്ടിമാരോട്  കൂടെ  സഞ്ചരിക്കുന്ന  മാര്‍ഷല്‍ കുറച്ചേ  ഉള്ളെങ്കിലും  നന്നായിരുന്നു  .

ക്ലിന്റ് ഈസ്റ്റ്‌വുഡ്  ആരാധകര്‍ക്കും  വെസ്റ്റേണ്‍  ഫിലിം ഇഷ്ട്ടപ്പെടുന്നവര്‍ക്കും  ഒരു  ട്രീറ്റ്  ആയിരിക്കും  ഈ ചിത്രം .

IMDB :7.3/10 

RT:92% 

High Plains Drifter (1973)

സെര്‍ജിയോ ലിയോണിന്റെ  'മാന്‍ വിത്ത്‌ നോ നെയിം'  ട്രയോളജിക്ക്  ശേഷം പ്രശസ്തിയുടെ  കൊടുമുടിയിലെത്തിയ ഈസ്റ്റ്‌വുഡിന്റെ  സുവര്‍ണ കാലഘട്ടമായിരുന്നു 70പതുകള്‍ . ഈസ്റ്റ്‌വുഡ് ഡയരക്ഷനിലേക്ക്  ചുവടു വെച്ചതും  ഈ  കാലഘട്ടത്തില്‍  ആയിരുന്നു .  ക്ലിന്റ്  നല്ലൊരു  നടന്‍  മാത്രമല്ല  അതിലും  നല്ലൊരു  സംവിധായകന്‍  കൂടിയാണെന്ന് രണ്ടാമത്തെ  സംവിധാന  സംരംഭമായ  High Plains Drifter ഇലൂടെ  സിനിമാലോകത്തിനു  മനസ്സിലായി .വെസ്റ്റേണ്‍ Genreഇലെ  വളരെ  ഡാര്‍ക്ക്‌  ആയ ചിത്രമായിരുന്നു High Plains Drifter. സെര്‍ജിയോ  ലിയോണ്‍  കഥാപാത്രത്തെ  പോലെ  തന്നെ  ഇതിലും  ഒരു  അപരിചിതന്‍  ആയിട്ടാണ്  ക്ലിന്റ്  വേഷമിട്ടിരിക്കുന്നത് . തന്റെ മെന്റര്‍ക്കുള്ള  ഒരു  ട്രിബ്യൂട്ട് ആയിട്ടാണ്  ഈ ചിത്രത്തെ  കണക്കാക്കുന്നത് .

ലാഗോ  എന്ന മൈനിംഗ് ടൌണ്‍ കേന്ദ്രീകരിച്ചാണ്  ചിത്രം  ഒരുക്കിയിരിക്കുന്നത് . അക്രമികളെ  കൊണ്ടും  ഗണ്‍ഫൈട്ടര്‍സിനെ  കൊണ്ടുമുള്ള   പ്രശ്നങ്ങള്‍ പതിവാണ് ലാഗോയില്‍ .  ഒരു ദിവസം  ടൌണിലേക്ക് ഒരപരിചിതന്‍ എത്തിച്ചേരുന്നു .സ്ഥലവാസികള്‍ സംശയത്തോടെയാണ്  അയാളെ  വീക്ഷിച്ചത് ..എന്നാല്‍ സ്ഥലത്തെ  പ്രശ്നക്കാരായ  മൂന്നു പേരെ  ഒതുക്കുന്നതോടെ  സ്ഥലവസികള്‍  അപരിചിതന്റെ അടുത്ത്  ഒരാവശ്യവുമായി  സമീപിക്കുന്നു .ജയില്‍വാസം  കഴിഞ്ഞു  ലാഗോയിലേക്ക് തിരിച്ചു  വരുന്ന   മൂന്നു  ഗണ്‍ ഫൈറ്റര്‍സിനെ  നേരിടാന്‍  സഹായിക്കാന്‍  അഭ്യര്‍ത്ഥിക്കുന്നു .പകരം  എന്തുവേണമെങ്കിലും  ചെയ്യാമെന്നു  നിബന്ധന  വെക്കുന്നു . പക്ഷെ  അപരിചിതന്  ലാഗോയില്‍  വേറെയും  ചില  രഹസ്യ  അജന്തകള്‍  ഉണ്ടായിരുന്നു . ടൌണിന്റെ  നിയന്ത്രണം  പതിയെ  അപരിചിതന്റെ  വരുതിക്കുള്ളിലേക്ക്  വരുന്നു . ലാഗോയിലെ  അയാളുടെ  ഡിക്ട്ടേറ്റര്‍ഷിപ്‌ സ്ഥലത്തെ  പ്രധാനികളില്‍  വിയോജിപ്പ്  ഉണ്ടാക്കുന്നു .  

 .എപ്പോഴും ചുണ്ടില്‍ സിഗാര്‍  പുകച്ചു കൊണ്ട് പരുഷമായി  സംസാരിക്കുന്ന    അയാള്‍  ലാഗോയില്‍  എത്തിയത്  എന്തിനായിരുന്നു  ..  രക്ഷിക്കാനോ  അതോ  ശിക്ഷിക്കാനോ ?

നെഗറ്റിവ്  ചുവയുള്ള  നായകന്‍  ആയി  ക്ലിന്റ്  ഈസ്റ്റ്‌വുഡ്  ചിത്രത്തില്‍  മികച്ച  പ്രകടനം കാഴ്ച വെച്ചു ..മറ്റു  നടന്മാരുടെ  പ്രകടനം  നന്നായെങ്കിലും  ഈസ്റ്റ് വുഡ്  സ്ക്രീനില്‍  വന്നാല്‍  മറ്റാരെയും ശ്രദ്ധിക്കില്ല  എന്നതാണ്  സത്യം .

ബോക്സ്‌ഓഫീസും  ക്രിട്ടിക്സും  ഇരുകയ്യും  നീട്ടി  സ്വീകരിച്ച  ചിത്രമായിരുന്നു High Plains Drifter.  നമ്മുടെ  ഭാഷയില്‍  പറഞ്ഞാല്‍  ക്ലിന്റ്  ഈസ്റ്റ്‌വുഡിന്റെ  ഒരു   'കൊല മാസ് ' ചിത്രം 

IMDB :7.6/10 

Unforgiven(1992)

It's a hell of a thing, killin' a man. Take away all he's got, and all he's ever gonna have.

ക്ലിന്റ്  ഈസ്റ്റ്‌വുഡ്  ചെയ്ത  അവസാനത്തെ  വെസ്റ്റേണ്‍  ചിത്രം .
  എക്കാലത്തെയും മികച്ച  വെസ്റ്റേണ്‍  ചിത്രങ്ങളില്‍ അണ്‍ഫോര്‍ഗിവന്റെ  സ്ഥാനം  മുന്‍ നിരയില്‍  തന്നെ  ആയിരിക്കും  . 65 ആം  അക്കാദമി  അവാര്‍ഡ്‌സില്‍  4  ഓസ്കാറുകള്‍  ആണ്  ചിത്രം  കരസ്ഥമാക്കിയത് . വെസ്റ്റേണ്‍  ചിത്രങ്ങളുടെ  സുവര്‍ണ്ണ  കാലഘട്ടത്തിന്റെ പരിസമാപ്തി ആയാണ്   അണ്‍ഫോര്‍ഗിവന്‍   എന്ന  ചിത്രത്തെ  പലരും  കണക്കാക്കുന്നത് . ക്ലിന്റ്  ഈസ്റ്റ്‌വുഡ് സംവിധായകന്‍  എന്ന നിലയിലും  ആക്ടര്‍  എന്ന നിലയിലും  മികച്ചു  നിന്നപ്പോള്‍  മോര്‍ഗന്‍  ഫ്രീമാന്‍ ,ജീന്‍ ഹാക്ക്മാന്‍  തുടങ്ങിയ  ശക്തമായ  സപ്പോര്‍ട്ടിംഗ് നിറയും  ചിത്രത്തില്‍  ഉണ്ടായിരുന്നു . 

 തന്റെ  ആയ കാലത്ത്  കൊള്ളയും  കൊലയും  നടത്തി  കുപ്രസിദ്ധനായിരുന്ന വില്ല്യം മുന്നി  (ക്ലിന്റ് ഈസ്റ്റ്‌വുഡ് ) ഇപ്പോള്‍    തന്റെ പഴയ കാല ജീവിതത്തില്‍ നിന്ന് മാറി തന്‍റെ ചെറിയ പന്നി  ഫാമില്‍ നിന്ന് കിട്ടുന്ന തുച്ചമായ ശമ്പളത്തില്‍ ഫമിലിയോടോത്ത്  ശാന്തമായ  ജീവിതം  നയിക്കുകയാണ് . അങ്ങനെയിരിക്കെ ദൂരെ വ്യോമിംഗ്  എന്ന നഗരത്തില്‍  രണ്ടു  കൌബോയ്  യുവാക്കള്‍ വേശ്യാലയത്തിലെ  അന്തേവാസി പെണ്‍കുട്ടിയെ ഉപദ്രവിക്കുന്നു .വ്യോമിംഗ്  ലിറ്റില്‍  ബില്‍ എന്ന ഷെരിഫിന്റെ  അധീനതയില്‍ ആണ് .പഴയ  ഒരു  ഗണ്‍  ഫൈറ്റര്‍  കൂടിയായിരുന്ന ലിറ്റില്‍  ബില്‍  തന്റെ  നഗരത്തില്‍  മറ്റൊരു  ഗണ്‍ ഫൈറ്റര്‍ വരുന്നതിനു  വിലക്കേര്‍പ്പെടുത്തിയിരുന്നു .അക്രമികളായ  യുവാക്കള്‍ക്ക്  ശിക്ഷ നടപ്പാക്കുന്നതിന്  പകരം ഒരു  തുക  അവര്‍ വേശ്യാലയ  നടത്തിപ്പുകാരനു  കൊടുത്താല്‍  മതിയെന്നു  തീര്‍പ്പാക്കി പ്രശ്നം ഒതുക്കി തീര്‍ക്കുന്നു   .ഈ  നടപടിയില്‍  അസഹിഷ്ണുത പ്രകടിപ്പിച്ച വേശ്യാലയത്തിലെ  അന്തേവാസിസ്ത്രീകള്‍  എല്ലാം  കൂടി യുവാക്കളെ കൊല്ലുന്നവര്‍ക്ക് ആയിരം ഡോളര്‍  ബൌണ്ടി  പ്രഖ്യാപിക്കുന്നു. 
റിവാര്‍ഡ്‌  തുക  കൈക്കലാക്കാന്‍  വേണ്ടി കൌബോയ് യുവാക്കളെ  കൊല്ലുന്നതിനു  വില്ല്യം  മുന്നിയുടെ  സഹായം  തേടി  സ്കോഫീല്‍ഡ്  എന്ന ചെറുപ്പക്കാരന്‍  കാന്‍സാസില്‍ എത്തുന്നു . ആദ്യം  അപേക്ഷ നിരസിക്കുന്നെങ്കിലും  തന്റെ  മക്കള്‍ക്ക്‌  വേണ്ടി  അവസാനമായൊരു  അങ്കത്തിനു  മുന്നി   ഇറങ്ങി  തിരിക്കുന്നു .മുന്നിയുടെ  ചിരകാല സുഹൃത്തായ  നെഡ് ലോഗന്‍ (മോര്‍ഗന്‍  ഫ്രീമാന്‍ ) വഴിയില്‍  വെച്ച്  മുന്നിയോടൊപ്പം  ചേരുന്നു .
ഇതേസമയം  വ്യോമിംഗില്‍ മറ്റൊരു  പ്രസിദ്ധ  ഗണ്‍  ഫൈറ്റര്‍  ആയ  ഇംഗ്ലീഷ്  ബോബ്  തന്റെ  ബയോഗ്രഫി എഴുതുന്ന  ബ്യൂച്ചംപ്  എന്ന ലേഖകനോടൊപ്പം  എത്തുന്നു . ലിറ്റില്‍  ബില്‍ ഉം  ബോബും  പണ്ട്  തൊട്ടേ  വൈരാഗ്യം  വെച്ച്  പുലര്‍ത്തുന്നവര്‍  ആണ് . ബോബിനെ  ലിറ്റില്‍ ബില്‍  അതി  ക്രൂരമായി  മര്‍ദിച്ച്  കൊണ്ട്  മറ്റു  ഗണ്‍  ഫൈറ്റര്‍സിന്  ഉദാഹരണം  കാണിച്ചു  കൊടുക്കുന്നു . ബയോഗ്രാഫെര്‍  ബ്യൂച്ചംപിനു  മുന്‍പില്‍  ബോബിനെ  അപമാനിച്ചു  നാട് കടത്തുന്നു . ബ്യൂച്ചംപ്  ലിറ്റില്‍  ബില്ലിന്റെ  ജീവിത  കഥയെഴുതാന്‍  വ്യോമിംഗില്‍  തങ്ങുന്നു . 
ഈ  സാഹചര്യത്തില്‍  ആണ്  വില്ല്യം  മുന്നിയും  നെഡ് ലോഗനും  വ്യോമിംഗില്‍  എത്തുന്നത് . ഇരുവരെയും  വാര്‍ധക്യ  സാഹചമായ  രോഗങ്ങള്‍  അലട്ടുന്നുമുണ്ട്‌ .ലിറ്റില്‍  ബില്ലിനെയും  ഡെപ്യൂട്ടിമാരെയും  മറി  കടന്നു  കൊണ്ട്   ദൌത്യം  പൂര്‍ത്തിയാക്കാന്‍ വില്ല്യം  മുന്നിക്ക്  കഴിയുമോ  എന്ന്  കണ്ടു  തന്നെ  അറിയുക . 
  

 ക്ലിന്റ്ന്റെ ഈസ്റ്റ്‌വുഡിന്റെ  മികച്ച കഥാപാത്രങ്ങളില്‍ ഒന്നാണ് വില്ല്യം മുന്നി .  ഷെരിഫ്  ലിറ്റില്‍  ബില്‍  ആയി അഭിനയിച്ച  ജീന്‍ ഹാക്ക്മാന്‍ ശക്തമായ  പ്രകടനമാണ്  കാഴ്ച  വെച്ചത് .   മുന്നിയുടെ  സുഹൃത്ത് നെഡ്  ആയി വേഷമിട്ട  മോര്‍ഗന്‍  ഫ്രീമാനും  മികച്ചു  നിന്നു  . ചിത്രത്തിന്‍റെ  ക്ലൈമാക്സ്‌  ഏതൊരു  പ്രേക്ഷകനെയും  ആവേശം  കൊള്ളിക്കുന്ന   ഒന്നാണ് .മികച്ച  ഒരുപാടു  ഡയലോഗുകള്‍  ഉണ്ട്  ചിത്രത്തില്‍ .പ്ലേ  മിസ്റ്റി  ഫോര്‍  മി  എന്ന ചിത്രത്തില്‍  പിച്ച  വെച്ച്  തുടങ്ങിയ  സംവിധായകന്‍  എത്രത്തോളം  ഉയരങ്ങളില്‍  എത്തിയിരിക്കുന്നു  എന്ന്  ചിത്രം  നമ്മെ  ഒര്മിപ്പികും  . 

.

ആ വര്‍ഷത്തെ  4 ഓസ്കാര്‍  അവാര്‍ഡുകള്‍  ചിത്രം  കരസ്ഥമാക്കിയിട്ടുണ്ട് . ബെസ്റ്റ് പിക്ചര്‍ ,ബെസ്റ്റ് ഡയറകറ്റര്‍ അവാര്‍ഡുകള്‍  ഈസ്റ്റ്‌വുഡ്  സ്വന്തമാക്കിയപ്പോള്‍  മികച്ച  സപ്പോര്‍ട്ടിംഗ്  ആക്ടര്‍ക്കുള്ള  അവാര്‍ഡ്‌  ജീന്‍  ഹാക്ക്മാന്‍  കരസ്ഥമാക്കി . ബെസ്റ്റ്  എഡിറ്റിംഗ്  അവാര്‍ഡും  ചിത്രത്തിന്  ലഭിച്ചു . മികച്ച  നടനുള്ള  ഓസ്കാര്‍  അവാര്‍ഡ്‌  ക്ലിന്റ്  ഈസ്റ്റ്‌വുഡിന് നോമിനേഷന്‍  ഉണ്ടായിരുന്നെങ്കിലും  അവാര്‍ഡ്‌  സെന്റ്‌  ഓഫ് വുമണ്‍  എന്ന   ചിത്രത്തിലെ  പ്രകടനത്തിന്  അല്‍ പചിനോക്ക്  വിട്ടു  കൊടുക്കേണ്ടി  വന്നു .

ക്ലിന്റ്  ഈസ്റ്റ്‌വുഡ്  ആരാധകര്‍  മാത്രമല്ല ,വെസ്റ്റേണ്‍  ചിത്രങ്ങളുടെ  ആരാധകര്‍ മാത്രമല്ല  എല്ലാ  സിനിമ  സ്നേഹികളും  കണ്ടിരിക്കേണ്ട  ചിത്രം .

IMDB rating - 8.3/10
RT: 95%

Ace in the Hole(1951)

ഇതൊരു  പരാജയ ചിത്രമായിരുന്നു .   ഈ  ചിത്രം  ആ കാലഘട്ടത്തിനു  ചേരുന്നത്  അല്ലായിരുന്നു എന്നതാണ് കാരണം. ബില്ലി  വില്‍ഡര്‍1951  ഇല്‍  പറഞ്ഞ  കഥ  കൂടുതല്‍ സ്യൂട്ട്  ആകുന്നത്  ഇന്നത്തെ  കാലഘട്ടത്തിലാണ് .
മാധ്യമങ്ങളുടെ  പൊള്ളത്തരങ്ങളും  മാനിപുലേഷന്‍  രീതികളും പരിചയമില്ലാതിരുന്ന  ഒരു  ജനത ക്ക്  ഈ  ചിത്രം  ദഹിക്കാതിരുന്നതില്‍  കുറ്റം  പറയാനുമാകില്ല ..
ന്യൂ യോര്‍ക്ക്‌ സിറ്റിയിലെ പത്രപ്രവര്‍ത്തകന്‍ ആയ   Chuck Tatum  ന്യൂ  മെക്സിക്കോയിലെ  ചെറിയ  ഒരു  പ്രസ്സില്‍  ആണ്  ഇപ്പോള്‍  വര്‍ക്ക്  ചെയ്യുന്നത് .  ന്യൂ യോര്‍ക്കില്‍  പത്തിലധികം  സ്ഥാപനങ്ങളില്‍  വര്‍ക്ക്  ചെയ്തിരുന്നെങ്കിലും  പല  കാരണങ്ങള്‍  കൊണ്ട്  അവിടുന്നെല്ലാം  പിരിച്ചു  വിട്ടതാണ് ടിയാനെ . ജോലിസമയത്ത്  വെള്ളമടി ,ബഹുമാനമില്ലായ്മ  ഇതൊക്കെ  തന്നെ  കാരണം . ഇപ്പൊ  ഒരു  വര്‍ഷത്തോളമായി  മെക്സിക്കോയില്‍  വര്‍ക്ക്  ചെയ്യാന്‍  തുടങ്ങിയിട്ട് . വളരെ  ചുരുങ്ങിയ  സര്‍ക്കുലേഷന്‍  ഉള്ള  ,അപ്രധാനമായ  വാര്‍ത്തകള്‍  പ്രസിദ്ധീകരിക്കുന്ന  ഇപ്പോഴുള്ള  സ്ഥാപനത്തിലെ  ജോലി  ചക്കിനു  അങ്ങേയറ്റം  മടുത്തു തുടങ്ങിയിരിക്കുന്നു  . ഇക്കാര്യം  സഹപ്രവര്‍ത്തകരോട്  പലപ്പോഴും   തുറന്നു  പ്രകടിപ്പിക്കുന്നുമുണ്ട്  .
അങ്ങനെയിരിക്കെ  റാറ്റില്‍ സ്നേക്ക്  വേട്ട യെ  കുറിച്ച്  ഒരു  ലേഖനം  തയ്യാറാക്കാന്‍  ഇറങ്ങി  പുറപ്പെട്ട  Tatum ,യാത്രയില്‍  പുരാതന  ഗുഹയില്‍ അകപ്പെട്ട  ലിയോ  മിനോസ  എന്നൊരാളെ  കുറിച്ച്  അറിയനിടയാകുന്നു . ഇതൊരു  സുവര്‍ണാവസരം  ആണെന്ന്  മനസ്സിലാക്കിയ  Tatum  സംഭവ  സ്ഥലത്തേക്ക്  പുറപ്പെടുന്ന്നു .
സംഭവ സ്ഥലത്ത്  അധികമാരും  എത്തിയിട്ടില്ല . അയാളുടെ  അച്ഛനും  ഭാര്യയും ഒരു  ലോക്കല്‍  പോലീസ്മാനും  മാത്രം .  Tatum  അവിടെ  എത്തി  സംഭവം  തന്റെ  നിയന്ത്രണത്തില്‍  ആക്കുന്നു . ലിയോ  മിനോസയെ  ഗുഹക്കുള്ളില്‍  ചെന്ന്  കണ്ടു  കാര്യങ്ങളുടെ  കിടപ്പ്  വശം  മനസ്സിലാക്കുന്ന  Tatum,  ഗുഹക്കുള്ളില്‍  നിന്നും  സുരക്ഷിതമായി  ഇറക്കാമെന്ന്  ഉറപ്പു  കൊടുക്കുന്നു . ലിയോ യുടെ  പരിതാപകരമായ  അവസ്ഥയില്‍  നിന്നും  പരമാവധി  ലാഭമുണ്ടാക്കാന്‍  ആയിരുന്നു  Tatum  പ്ലാന്‍  ചെയ്തിരുന്നത് . ഒന്ന്  രണ്ടു  ദിവസം  കൊണ്ട്  പുരതിറക്കാമായിരുന്നെങ്കിലും  ഗുഹക്കു  മുകളിലൂടെ  ഡ്രില്‍  അടിച്ചു  7  ദിവസം  കൊണ്ട്  ലിയോ യെ  പുറത്തിറക്കാന്‍ Tatum  പദ്ധതി  തയ്യാറാക്കുന്നു . ലിയോ യുടെ  ഭാര്യ ,സ്ഥലത്തെ  Sheriff തുടങ്ങി തനിക്കു  കുറുകെയുള്ളവരെഎല്ലാം   തന്റെ  വഴിക്ക്  കൊണ്ട് വരാന്‍  ചക്കിനു  സാധിച്ചു . സംഭവത്തെ  കുറിച്ചുള്ള  പത്രവാര്‍ത്തകള്‍  ശരിക്കും  ഒരു  ബ്രേക്കിംഗ്  ന്യൂസ്‌  ആയി മാറി  ...ദിവസവും  ആയിരക്കണക്കിന്  ആളുകള്‍  സംഭവ സ്ഥലത്തേക്ക്  തടിച്ചു കൂടാന്‍ തുടങ്ങി  . ആളുകല്ല്ക്കുള്ള  ഭക്ഷണവും  പാനീയവും  വിതരണം  ചെയ്യുന്നതിനായി   പല  കച്ചവടക്കാരും  അവിടെ തമ്പടിക്കുന്നു ..അങ്ങനെ  പതിയെ  പതിയെ റെസ്ക്യൂ  പ്രദേശം  ഒരു  കാര്‍ണിവല്‍  പ്രതീതിയിലെത്തുന്നു .. Tatum    വീണ്ടും  തന്റെ കരുക്കള്‍ നീക്കുന്നു .
ബില്ലി വില്‍ഡറുടെ  മികച്ച  ഒരു  ചിത്രം  തന്നെയാണ് Ace in the Hole .ബില്ലി  വില്‍ഡറുടെ  ഡയറക്ഷനും  Kirk Douglas ന്റെ  പ്രകടനവുമാണ്  ചിത്രത്തിന്റെ  മുഖ്യ  ആകര്‍ഷണം . Chuck Tatum എന്ന കുശാഗ്രബുദ്ധിയായ ന്യൂസ്‌ റിപ്പോര്‍ട്ടര്‍   ആയി  Kirk  Douglas മികച്ച  പ്രകടനമാണ്  കാഴ്ച  വെച്ചത് .ലിയോ  യുടെ  ഭാര്യ  വേഷം  അഭിനയിച്ച  നടിയും കൊള്ളാമായിരുന്നു .
ഏതാണ്ടിതേ  പ്രമേയം  തന്നെയാണ്  ഈയടുത്തിറങ്ങിയ  Nightcrawler  എന്ന ചിത്രവും  പറയുന്നത് . വളരെ  ഇന്റെരെസ്റ്റിംഗ്  ആയി  കഥ  പറഞ്ഞിരിക്കുന്ന  ഈ ചിത്രത്തില്‍  മുഖ്യ  കഥാപാത്രങ്ങളെല്ലാം  നെഗറ്റീവ്  സ്വഭാവം  ഉള്ളവരാണ് .
  മാധ്യമങ്ങള്‍ക്ക്  നേരെയുള്ള  അക്രമം  എന്നൊക്കെ  ചിലര്‍  അന്ന്  ഈ  ചിത്രത്തെ  വിമര്‍ശിച്ചിരുന്നു  ..ഇപ്പോഴെന്തായാലും  ആ  വിമര്‍ശനത്തില്‍  കഴമ്പില്ലാതായിരിക്കുന്നു .
ഇക്കാലത്തും    പ്രസക്തമായ   വിഷയം  കൈകാര്യം  ചെയ്യുന്ന  ഈ  ചിത്രം  കാണാന്‍  ശ്രമിക്കുക .
IMDB:8.2/10 

Inherit the Wind (1960)

ലോകമെന്പാടുമുള്ള മത ഭ്രാന്തന്മാരുടെ കുരുപൊട്ടിയൊലിപ്പിച്ച ചിത്രമാണ് Inherit the Wind . 1925 ഇല്‍ നടന്ന Scopes Monkey Trial ആണ് ചിത്രത്തിനാധാരം . 

ഡാര്‍വിന്റെ പരിണാമ സിദ്ധാന്തം പഠിപ്പിച്ചതിനു സ്ഥലത്തെ ശാസ്ത്രാദ്ധ്യാപകന്‍ അറസ്റ്റിലാകുന്നു .സ്ഥലത്തെ വിശ്വാസികള്‍ മുഴുവനും അധ്യാപകന്റെ ചോരക്കു മുറവിളി കൂട്ടുന്നു . ഡാര്‍വിന്‍ തിയറി യെ ശക്തമായി എതിര്‍ക്കുന്ന പ്രശസ്തനായ മാത്യു ഹാരിസണ്‍ ബ്രാഡി പ്രോസിക്യൂഷന്‍ ഏറ്റെടുക്കുന്നതോടെ സംഭവം ലോക ശ്രദ്ധയാകര്‍ഷിക്കുന്നു . ബ്രാഡിയെ ഒരു വിശുദ്ധാത്മാവ് ആയി കാണുന്നവരാണ് സ്ഥലത്തെ ഭൂരിപക്ഷവും . 

അധ്യാപകന് വേണ്ടി വാദിക്കാന്‍ തികഞ്ഞ യുക്തിവാദിയായ ഹെന്രി ഡ്രമോണ്ട് എത്തുന്നതോടെ രംഗം ഒന്ന് കൂടി കൊഴുക്കുന്നു . 

മതവും ശാസ്ത്രവും നേര്‍ക്ക്‌ നേര്‍ ഏറ്റു മുട്ടിയ ചരിത്ര നിമിഷമായിരുന്നു Scopes Monkey Trial . കഥാപാത്രങ്ങളുടെ പേരുകള്‍ മാറ്റി എന്നോഴിച്ചാല്‍ ആ സംഭവത്തിന്റെ നേര്‍കാഴ്ചയായിരുന്നു Inherit the Wind . 

ഞാന്‍ കണ്ടതില്‍ വെച്ച് എനിക്കേറ്റവും ഇഷ്ട്ടപ്പെട്ട കോടതി രംഗം inherit the wind ഇലാണുള്ളത് . മാത്യു ഹാരിസണ്‍ ബ്രാഡിയെ ഹെന്രി ഡ്രമോണ്ട് വിസ്തരിക്കുന്ന രംഗം എതോരുതന്റെയും ഉള്ളിലെ യുക്തി ചിന്തയെ ഇളക്കി വിടും .

ചിത്രത്തിലെ എന്റെ പ്രിയപ്പെട്ട ഒരു രംഗം ഇപ്രകാരമാണ് 

ബ്രാഡി :നമ്മള്‍ വിശ്വാസം കൈവെടിയാന്‍ പാടില്ല .വിശ്വാസമാണ് ഏറ്റവും പ്രധാനപ്പെട്ടത് .

ഡ്രമോണ്ട് :പിന്നെ എന്തിനാണ് ചിന്തിക്കാനുള്ള കഴിവ് തന്നു ദൈവം മനുഷ്യനെ വഴിതെറ്റിച്ചത് . Mr ബ്രാഡി , ഭൂമിയിലെ മറ്റു ജീവികളില്‍ നിന്നും മനുഷ്യനെ വ്യത്യസ്തനാക്കുന്ന ചിന്തിക്കാനുള്ള കഴിവിനെ നിങ്ങള്‍ എന്തിനു നിഷേദിക്കുന്നു?വേറെ എന്ത് പ്രത്യേകത ആണ് നമുക്കുള്ളത് ? ആനക്കാണെങ്കില്‍ വലിപ്പമുണ്ട്‌ ,കുതിരക്ക് കരുത്തും വേഗതയുമുണ്ട് ,ചിത്രശലഭത്തിനു സൌന്ദര്യമുണ്ട് .എന്തിനു ഒരു സ്പോഞ്ച് പോലും മനുഷ്യനെക്കാള്‍ നിലനില്‍പ്പ്‌ ഉള്ളതാണ് .പക്ഷെ സ്പോഞ്ചിനു ചിന്തിക്കാന്‍ കഴിയുമോ ?

ബ്രാഡി : എനിക്കറിയില്ല .ഞാനൊരു മനുഷ്യനാണ് ,സ്പോഞ്ചല്ല ഡ്രമോണ്ട്: പക്ഷെ സ്പോഞ്ചിനു ചിന്തിക്കാന്‍ കഴിയും എന്ന് താങ്കള്‍ കരുതുന്നുണ്ടോ ?

ബ്രാഡി : ദൈവം സ്പോഞ്ച് ചിന്തിക്കട്ടെ എന്ന് വിചാരിച്ചാല്‍ സ്പോഞ്ചും ചിന്തിക്കും 

ഡ്രമോണ്ട്: അപ്പോള്‍ ഒരു സ്പോഞ്ചിനുള്ള പ്രിവിലേജ് മനുഷ്യനും ഉണ്ടെന്നു താങ്കള്‍ കരുതുന്നുവോ ?

ബ്രാഡി : തീര്‍ച്ചയായും 

ഡ്രമോണ്ട്: അങ്ങനെയാണെങ്കില്‍ ഈ മനുഷ്യനും ഒരു സ്പോഞ്ചിനുള്ള പ്രിവിലേജ് മാത്രമേ ആഗ്രഹിച്ചിട്ടുള്ളൂ ,he wishes to think.

ഇത് പോലെ അതി രസകരമായ ഒട്ടേറെ മുഹൂര്‍ത്തങ്ങളുണ്ട്‌ ചിത്രത്തില്‍ . തീര്‍ച്ചയായും എല്ലാവരും കാണേണ്ട ചിത്രം 

ഇതില്‍ ക്രിസ്തു മതത്തെ പരാമര്‍ശിച്ചു എങ്കിലും എല്ലാ മതങ്ങള്‍ക്കും ഉന്നം വെക്കുന്നുണ്ട് ചിത്രം .കൊള്ളുന്നുമുണ്ട്‌ 

അമേരിക്കയിലെ സ്കൂളുകളിലും കോളേജുകളിലും ഈ ചിത്രം ഇപ്പോഴും കാണിക്കാറുണ്ട് .