മനസിനെ തൊട്ടുണര്‍ത്തുന്ന ഒരു മനോഹര ചിത്രം .ജാപ്പനീസ് ആചാരത്തിലുള്ള മരണാനന്തര ചടങ്ങുകള്‍ക്ക് ഒരു ട്രിബ്യൂട്ട്.
മസാഹിരോ മോട്ടോകി(ചിത്രത്തിലെ പ്രധാന നടന്‍ ) ഗംഗ തീരത്ത് വെച്ച് കണ്ട ഒരു ശവദഹനചടങ്ങ് പുള്ളിയെ വല്ലാതെ സ്വധീനിച്ചതിന്റെ ഫലമായാണ്‌ ഇങ്ങനെ ഒരു ഐഡിയ പിറന്നത് . ജാപ്പനീസ് ആചാരപ്രകാരമുള്ള ശവ സംസ്കാരം വളരെ വിചിത്രവും മനോഹരവുമാണ് . ശവം ദഹിപ്പിക്കുന്നതിന് മുന്പായി മൃതദേഹത്തെ അണിയിച്ചൊരുക്കുന്ന ചടങ്ങുണ്ട് ..ഇതിനായി പ്രത്യേക 'സ്പെഷ്യലിസ്റ്റ് ' ഉണ്ടാകും . മൃതശരീരത്തിനെ വൃത്തിയക്കുകയും മേക്കപ്പ് ഇടുകയും വസ്ത്രം ധരിപ്പിക്കുകയും ഒക്കെ ഇവരാണ് . ഒരു മജീഷ്യന്റെ സൂക്ഷ്മതയോടെ കുടുംബാംഗങ്ങള്‍ക്ക് മുന്‍പില്‍ ഇവര്‍ ഇതെല്ലാം ചെയ്യും . ഇങ്ങനെയുള്ള ഒരു സ്പെഷ്യലിസ്റ്റിന്റെ കഥയാണ് ചിത്രം പറയുന്നത് .
ചിത്രത്തിലെ നായകന്‍ ദൈഗോ കൊബായാഷി ഒരു സെല്ലിസ്റ്റ് ആണ് .ബാന്‍ഡ് പിരിച്ചു വിടുന്നതോടെ ദൈഗോയുടെ ജോലി നഷ്ട്ടമാകുന്നു . സെല്ലിസ്റ്റ് പ്രൊഫെഷന്‍ ഉപേക്ഷിച്ചു മറ്റേതെങ്കിലും ജോലി അന്വേഷിക്കാന്‍ തീരുമാനിക്കുന്ന ദൈഗോ , ഭാര്യോടൊപ്പം തന്റെ ഹോം ടൌണി ലേക്ക് സ്ഥലം മാറുന്നു . ദൈഗോ യുടെ അമ്മയുടെ മരണശേഷം അവശേഷിച്ച ഒരു വീടുണ്ട് അവിടെ . അമ്മക്ക് വേണ്ടത്രം പരിചരണം കൊടുക്കാന്‍ കഴിയാത്തതിന്റെ കുറ്റബോധം ദൈഗോയെ വേട്ടയാടുന്നുണ്ട്‌ . അതോടൊപ്പം തന്നെ തങ്ങളെ ഉപേക്ഷിച്ചു പോയ അച്ഛനോടുള്ള വെറുപ്പും .
അങ്ങനെയിരിക്കെ ദൈഗോ , ഒരു കമ്പനിയില്‍ ജോലി ഒഴിവിനെ സംബന്ധിച്ച പരസ്യം ശ്രദ്ധിക്കാനിടയാകുന്നു . 'ഡിപാര്‍ച്ചര്‍' സംബന്ധിച്ചുള്ള ജോലിയാണെന്ന് കണ്ടു ,വല്ല ട്രാവല്‍ ഏജന്‍സി ആയിരിക്കുമെന്ന് കരുതി ദൈഗോ ഇന്റര്‍വ്യൂ പങ്കെടുക്കാന്‍ പോകുന്നു .എന്നാല്‍ ശവങ്ങളെ അണിയിച്ചൊരുക്കുന്ന ജോലിയാണതെന്നു ദൈഗോ മനസിലാക്കുന്നു . തിരിച്ചു പോകാന്‍ തയ്യാറായെങ്കിലും പുതിയ ബോസ് വെച്ച് നീട്ടുന്ന വലിയ അഡ്വാന്‍സ് തുക ദൈഗോയുടെ മനസ് മാറ്റുന്നു . ഭാര്യയില്‍ നിന്നും സുഹൃത്തുക്കളില്‍ നിന്നും മറച്ചു വെച്ച് കൊണ്ട് ദൈഗോ പുതിയ ജോലി ആരംഭിക്കുന്നു .തന്റെ പുതിയ ജോലിയില്‍ അപകര്‍ഷതാബോധം ആദ്യം ഒക്കെ ഉണ്ടായിരുന്നെങ്കിലും ദൈഗോ പിന്നീട് തന്റെ ജോലി ഇഷ്ട്ടപ്പെടാന്‍ തുടങ്ങുന്നു .
ചിരിപ്പിച്ചും കണ്ണ് നിറയിപ്പിച്ചും പുരോഗമിക്കുന്ന ഈ ചിത്രം പ്രേക്ഷകന് നല്‍കുന്നത് നല്ലൊരു അനുഭവം ആണ് . വെറും ഒരു ഫാമിലി ഇമോഷണല്‍ ചിത്രമായും ഇതിനെ കാണാനാകില്ല . ജാപ്പനീസ് ആചാരങ്ങളെ ഒക്കെ വളരെ മനോഹരമായി പകര്‍ത്തിയിട്ടുണ്ട് . ചിത്രത്തിലെ മുഖ്യ താരങ്ങളുടെ പ്രകടനം മികച്ചു നില്‍ക്കുന്നു . ജാപ്പനീസ് ആചാരങ്ങളെ കുറിച്ച് ഒന്നുമറിയാത്തവര്‍ക്ക് പോലും അതിശയവും ആകര്ഷകവുമായി തോന്നിപ്പിക്കുന്ന തരത്തില്‍ ചിത്രം ഒരുക്കുന്നതില്‍ സംവിധയകന്‍ വിജയിച്ചിരിക്കുന്നു . ആ വര്‍ഷത്തെ മികച്ച ഫോറിന്‍ ലാംഗ്വേജ് ചിത്രത്തിനുള്ള "അക്കാദമി അവാര്‍ഡ്‌" ഡിപാര്‍ചര്‍സ് സ്വന്തമാക്കി .
ഒരു നിമിഷം പോലും മടുപ്പിക്കുന്നില്ല ഈ ഫീല്‍ ഗുഡ് ചിത്രം .കാണാന്‍ ശ്രമിക്കുക
IMDB:8.1/10
RT:81%
No comments:
Post a Comment