സെര്‍ജിയോ ലിയോണിന്റെ ലോക പ്രശസ്ത സ്പാഗെട്ടി വെസ്റ്റേണ്‍ ചിത്രങ്ങളായ എ ഫിസ്റ്റ്ഫുള്‍ ഓഫ് ഡോളര്‍ ,ഫോര്‍ എ ഫ്യൂ ഡോളര്‍ മോര്‍ ,ഗുഡ് ബാഡ് ആന്‍ഡ്‌ അഗ്ലി എന്നീ ചിത്രങ്ങളെയാണ് ഡോളര്‍ ട്രിളോജി / മാന്‍ വിത്ത്‌ നോ നെയിം ട്രിളോജി എന്ന് വിശേഷിപ്പിക്കുന്നത് .ട്രിളോജി എന്ന് വിളിക്കുന്നുണ്ടെങ്കിലും കഥയില്‍ കാര്യമായ സാമ്യങ്ങള്‍ ഒന്നും കാണാന്‍ കഴിയില്ല . 3 ചിത്രത്തിലും ക്ലിന്റ് ഈസ്റ്റ്‌വുഡ് അവതരിപ്പിച്ച ഒരേ സ്വഭാവമുള്ള നായക കഥാപാത്രം ആണ് ഇത് മൂന്നിനെയും ബന്ധിപ്പിക്കുന്ന ഒരു കോമണ്‍ ഫാക്ടര്‍ . പേര് വെളിപ്പെടുത്താത്ത കഥാപാത്രമാണെങ്കിലും മൂന്നു ചിത്രത്തിലും യഥാക്രമം ജോ ,മാന്‍കൊ ,ബ്ലോണ്ടി എന്നീ വിളിപേരുകള്‍ പരാമര്‍ശിക്കുന്നുണ്ട് . ഡോളര്‍ ട്രിളോജിയുടെ വിജയത്തിന് ഇതിലെ ബാക്ക്ഗ്രൌണ്ട് മ്യൂസിക്‌ വഹിച്ച സ്ഥാനം ചെറുതല്ല .
.
A Fistful of Dollars (1964)
_____________________
അകിറ കുറസോവയുടെ 'യോജിമ്പോ 'എന്ന സമുറായ് ക്ലാസിക്കിന്റെ റീമേക്ക് ആയിരുന്നു എ ഫിസ്റ്റ്ഫുള്‍ ഓഫ് ഡോളര്‍ .യോജിമ്പോയെ വളരെ സ്റ്റൈലിഷ് ആയ ഒരു വെസ്റ്റേണ്‍ ചിത്രമാക്കി ഒരുക്കാന്‍ ലിയോണിനു സാധിച്ചു . ക്ലിന്റ് ഈസ്റ്റ്‌വൂഡ് എന്ന നടനെ അന്താരാഷ്ട്ര തലത്തില്‍ ശ്രദ്ധിക്കാന്‍ തുടങ്ങിയത് ഈ ചിത്രം മുതല്‍ ആയിരുന്നു . ചിത്രത്തിലെ മികച്ച ബാക്ക്ഗ്രൌണ്ട് മ്യൂസിക്കിന്റെ അകമ്പടിയോടെയുള്ള പല രംഗങ്ങളും വീണ്ടും വീണ്ടും കാണാന്‍ താല്പര്യം ജനിപ്പിക്കുന്നവയാണ് .
മെക്സിക്കന്‍ അതിര്‍ത്തിക്കടുത്തുള്ള സാന്‍ മിഗ്വല്‍ എന്ന പട്ടണത്തിലേക്ക് ഒരു അപരിചിതന്‍ (ക്ലിന്റ് ഈസ്റ്റ്‌വുഡ് ) എത്തുന്നു . 4 പേരെ കൊല്ലുന്നതോടെ അയാളുടെ വേഗതയും കൃത്യതയും അവിടെ സംസാര വിഷയമാകുന്നു . ടൌണിന്റെ നിയന്ത്രണം ഏറ്റെടുക്കുവാനായി അവിടെയുള്ള രണ്ടു ഫാമിലികള്‍ തമ്മിലുള്ള പോരാട്ടങ്ങളെ പറ്റി സത്ര നടത്തിപ്പുകാരനില്‍ നിന്നും അയാള്‍ അറിയുന്നു . ഡോണ്‍ മിഗ്വല്‍ ,എസ്റ്റബാന്‍ ,രാമോണ്‍ എന്നീ റോജോ സഹോദരന്മാര്‍ ഒരു ഭാഗത്തും ജോണ്‍ ബാക്സ്റ്ററിന്റെ ഷെരിഫ് ഫാമിലി മറുഭാഗത്തും .രണ്ടു കൂട്ടരും തന്നെ അവരുടെയൊപ്പം ചേര്‍ക്കാന്‍ ശ്രമിക്കുമെന്നറിയാവുന്ന അയാള്‍ രണ്ടു ഭാഗത്തും നിന്ന് കളിക്കാന്‍ തുടങ്ങുന്നു . അങ്ങനെയിരിക്കെ മെക്സിക്കന്‍ പട്ടാളക്കാര്‍ ഗോള്‍ഡ്‌ ട്രാന്‍സ്പോര്‍ട്ട് ചെയ്യുന്നുണ്ടെന്നരിയുന്ന രാമോണ്‍ പട്ടാളക്കാരെ പതുങ്ങിയിരുന്നു കൂട്ട കുരുതി നടത്തുന്നു . എന്നാല്‍ ഇതെല്ലാം കണ്ടു കൊണ്ടിരുന്ന അപരിചിതന്‍ ഗോള്‍ഡ്‌ സ്വന്തമാക്കാനുള്ള പദ്ധതികള്‍ തയ്യാറാക്കുന്നു . ഇതിനോടൊപ്പം തന്നെ രാമോണ്‍ തടവില്‍ പാര്‍പ്പിച്ച ഒരു സ്ത്രീയെ അവളുടെ ഭര്‍ത്താവിന്റെയും കുട്ടിയുടെയും പക്കലേക്ക് എത്തിക്കാനും അയാള്‍ ശ്രമിക്കുന്നു .
ക്ലിന്റ് ഈസ്റ്റ്‌വുഡ് എന്ന നടനെ ഏറ്റവും സ്റ്റൈലിഷ് ആയി കണ്ടത് ഈ ചിത്രത്തില്‍ ആണ് . ഒരുപാടു മികച്ച സംഭാഷണങ്ങളും കോരിത്തരിപ്പിക്കുന്ന രംഗങ്ങളുമുണ്ട് ചിത്രത്തില്‍ . രാമോണ്‍ ആയി അഭിനയിച്ച Gian Maria Volonte യും നന്നായിരുന്നു .യോജിമ്പോ കണ്ട പ്രേക്ഷകരാണ് നിങ്ങള്‍ എങ്കില്‍ കൂടിയും ഈ ചിത്രം നിങ്ങള്‍ക്കിഷ്ട്ടപ്പെടും .
കുറഞ്ഞ ബജറ്റില്‍ ഒരുക്കിയ ചിത്രം പക്ഷെ വലിയ വിജയമായിരുന്നു ബോക്സ്‌ഓഫിസില്‍ . ഒരു നിമിഷം പോലും ബോറടിപ്പിക്കാത്ത ഒരു മികച്ച എന്റര്‍ടൈനര്‍ .
IMDB: 8.1/10
RT: 98%
For a Few Dollars More(1965)
________________________
എ ഫിസ്റ്റ്ഫുള്‍ ഓഫ് ഡോളര്‍ ഇറങ്ങി ഇറ്റലിയില്‍ വിജയമായി കൊണ്ടിരിക്കുമ്പോള്‍ തന്നെ അടുത്ത പ്രോജെക്റ്റിനു ലിയോണ്‍ പദ്ധതികള്‍ ആരംഭിച്ചിരുന്നു .ഈ ചിത്രത്തിലും ഈസ്റ്റ്‌വുഡിനെ അഭിനയിപ്പിക്കാന്‍ സമ്മതിപ്പിക്കണം . ലിയോണിനൊപ്പം അഭിനയിച്ച കഴിഞ്ഞ ചിത്രം കാണാതെ മറ്റൊരു ചിത്രത്തില്‍ അഭിനയിക്കാന്‍ ഈസ്റ്റ്‌വുഡ് തയ്യാറായിരുന്നില്ല . അമേരിക്കന്‍ വേര്‍ഷന്‍ ഇറങ്ങിയിട്ട് പോലുമില്ലായിരുന്നു അന്ന് . അണിയറ പ്രവര്‍ത്തകര്‍ ഒരു ഇറ്റാലിയന്‍ ഭാഷാ പ്രിന്റ്‌ ഈസ്റ്റ്‌വുഡിന് എത്തിച്ചു കൊടുക്കുകയുണ്ടായി . തന്റെ സുഹൃത്തുകള്‍ക്കൊപ്പം ചിത്രം കണ്ട ഈസ്റ്റ്‌വുഡിന് ഭാഷ ഒന്നും മനസിലായെങ്കിലും ചിത്രം വളരെ ഇഷ്ട്ടപ്പെട്ടു . വൈകാതെ തന്നെ നെക്സ്റ്റ് പ്രോജക്റ്റില്‍ അഭിനയിക്കാന്‍ സമ്മതം മൂളുകയും ചെയ്തു .
ആദ്യ ഭാഗതിനെക്കാള്‍ വലിയ വിജയമായിരുന്നു ഈ ചിത്രം കൈവരിച്ചത് . കഴിഞ്ഞ ചിത്രം പോലെ തന്നെ മികച്ച ബാക്ഗ്രൌണ്ട് സ്കോറും സംഭാഷണങ്ങളുമെല്ലാം ഇതിലും ഉണ്ടായിരുന്നു . ആദ്യ പാര്‍ട്ടില്‍ ഒരു ഗണ്‍ ഫൈറ്റര്‍ മാത്രമായിരുന്നു ഈസ്റ്റ്‌വുഡ് അവതരിപ്പിച്ച കഥാപാത്രം എങ്കില്‍ ഇതവണ ഒരു ബൌണ്ടി ഹണ്ടര്‍ കൂടിയാണ് . ക്ലിന്റ് ഈസ്റ്റ്‌വൂഡിനൊപ്പം ഇത്തവണ ലീ വാന്‍ ക്ലീഫും സ്ക്രീന്‍ പങ്കിടുന്നുണ്ട്‌ .മാന്‍കൊ എന്നാണ് ഈസ്റ്റ്‌വുഡിന്റെ കഥാപാത്രത്തെ ചിത്രത്തില്‍ അഭിസംബോധന ചെയ്യുന്നത് .
എല്‍ ഇന്‍ഡിയോ എന്ന കുപ്രസിദ്ധനായ കൊള്ളത്തലവനെ പിടികൂടാനായി മാന്‍കൊ , കേണല്‍ ഡഗ്ലസ് ബാള്‍ട്ടിമോര്‍ എന്നീ ബൌണ്ടി ഹണ്ടര്‍സ് ഒരുമിക്കുന്നു . മുന്‍പ് മറ്റൊരു ബൌണ്ടി ഹണ്ടിംഗിനിടയില്‍ ആയിരുന്നു ഇരുവരും കണ്ടു മുട്ടിയത് . കേണല്‍ ഡഗ്ലസ് പിന്തുടര്‍ന്ന ടാര്‍ഗെറ്റിനെ ലക്ഷ്യമാക്കി മാന്‍കൊ എത്തുന്നതോടെ ഇരുവരും ആദ്യമൊന്നു കോര്‍ത്തെങ്കിലും പിന്നീട് എല്‍ ഇന്‍ഡിയോ എന്ന ശക്തനായ കൊള്ളക്കാരനെ നേരിടുന്നതിനായി ഒരുമിച്ചു പ്രവര്‍ത്തിക്കാന്‍ തീരുമാനിക്കുകയായിരുന്നു . മാന്‍കൊ സംഘത്തില്‍ ഒരാളായി ഇന്‍ഡിയോയുടെ വിശ്വാസം പിടിച്ചു പറ്റുന്നു . ഇന്‍ഡിയോ വളരെ അപകടകാരിയാണെന്ന് മാന്‍കൊ കുറഞ്ഞ നാളുകള്‍ കൊണ്ട് തന്നെ മനസിലാക്കുന്നു . അങ്ങനെയിരിക്കെ എല്‍ പാസോയിലെ ബാങ്ക് കൊള്ളയടിക്കാന്‍ ഇന്‍ഡിയോ പദ്ധതിയിടുന്നു . കൊള്ളയടിച്ച സേഫ് തുറക്കാന്‍ കഷ്ട്ടപ്പെടുന്ന ഇന്‍ഡിയോയെ സഹായിച്ചു കൊണ്ട് കേണല്‍ ഡഗ്ലസും സംഘത്തില്‍ കയറി പറ്റുന്നു . മാന്‍കോയും ഡഗ്ലസും ബാങ്ക് മണി കൈക്കലാക്കാന്‍ ശ്രമിക്കുന്നതിനിടെ പിടിയിലാകുന്നു . ഒരുപാട് മര്‍ദനമേറ്റ് അവശരായ അവരെ മോചിപ്പിക്കാന്‍ വന്ന ആളെ കണ്ടു അവര്‍ അത്ഭുതപ്പെടുന്നു . എല്‍ ഇന്‍ഡിയോയുടെ വലം കൈയ്യായ നിനോ . എല്‍ ഇന്‍ഡിയോ യുടെ പദ്ധതി എന്താണെന്നു ഒരു പിടിയുമില്ലാതെ ഇരുവരും അവിടെ നിന്ന് രക്ഷപ്പെടുന്നു . പിന്നീട് രസകരമായ മുഹൂര്‍ത്തങ്ങളിലൂടെ കഥ സഞ്ചരിക്കുന്നു .
മുന്‍ചിത്രത്തെ പോലെ തന്നെ ഒരു ഈസ്റ്റ്‌വുഡ് ഷോ ആയിരുന്നു ഈ ചിത്രവും . ലീ വാന്‍ ക്ലീഫ് കേണല്‍ ഡഗ്ലസായി മികച്ചു നിന്നപ്പോള്‍ ഇത്തവണയും വില്ലന്‍ വേഷം മനോഹരമാക്കാന്‍ Gian Maria Volonte ക്ക് സാധിച്ചു .
എ ഫിസ്റ്റ് ഫുള്‍ ഓഫ് ഡോളറും ,ഫോര്‍ എ ഫ്യൂ മോര്‍ ഡോളറും ഇറ്റലിയില്‍ വന്‍ ഹിറ്റ് ആയിരുന്നെങ്കിലും 1967 ഇല്‍ ഗുഡ് ബാഡ് ആന്‍ഡ്‌ അഗ്ലി യുടെ US റിലീസിന് ശേഷമാണു വേള്‍ഡ് വൈഡ് ശ്രദ്ധിക്കപ്പെട്ടത് .ബാക്കിയെല്ലാം ചരിത്രം .
IMDB:8.3/10
RT:94%
The Good ,the Bad and the Ugly (1966)
_______________________________
ദി ഗുഡ് ദി ബാഡ് ആന്‍ഡ്‌ ദി അഗ്ലി യെ കുറിച്ച് കേട്ടിട്ടില്ലാത്തവര്‍ വിരളമായിരിക്കും .1966 ഇല്‍ ഇറങ്ങിയ ഈ സ്പഗെട്ടി വെസ്റ്റേണ്‍ ഇതിഹാസം ,ട്രിളോജിയിലെ ഏറ്റവും മികച്ചതായി അറിയപ്പെടുന്നു . ചിത്രത്തിന്റെ പോപുലാരിറ്റിക്ക് ഇതിലെ ബാക്ഗ്രൌണ്ട് മ്യൂസിക്‌ വഹിച്ച പങ്ക് ചെറുതല്ല. മറ്റു രണ്ടു ചിത്രങ്ങളുടെ പ്രീക്വല്‍ ആണ് ഇതെന്നൊരു വാദമുണ്ട് . ഇപ്പോഴും imdb ടോപ്‌ 250 യില്‍ എട്ടാം സ്ഥാനം അലങ്കരിക്കുന്നു ഈ ചിത്രം . ക്ലിന്റ് ഈസ്റ്റ്‌വുഡ് ,ലീവാന്‍ ക്ലീഫ് .എലി വാല്ലച് എന്നിവരാണ്‌ ടൈറ്റില്‍ സൂചിപ്പിക്കുന്ന ഗുഡ് , ബാഡ് ,അഗ്ലി എന്നീ റോളുകളില്‍ സ്ക്രീനില്‍ പ്രത്യക്ഷപ്പെടുന്നത് .
അമേരികന്‍ അഭ്യന്തരയുദ്ധകാലഘട്ടത്തില്‍ ബ്ലോണ്ടി (ഗുഡ് ),ടുകോ (അഗ്ലി ) ഏഞ്ചല്‍ ഐസ് (ബാഡ് ) എന്നീ ഗണ്‍ ഫൈറ്റര്‍സ് കാണാതായ നിധി തേടി പോകുന്നതാണ് ചിത്രത്തിന്റെ ഇതിവൃത്തം . ടുകോ യും ബ്ലോണ്ടിയും ഒരുമിച്ചാണ് യാത്രയെങ്കിലും രണ്ടു പേര്‍ക്കും പരസ്പരവിശ്വാസം ഇല്ല .ഇവര്‍ തമ്മിലുള്ള ക്യാറ്റ് ആന്‍ഡ്‌ മൗസ് ഗെയിം ആണ് ചിത്രത്തെ രസകരമാക്കുന്നത് .ഏഞ്ചല്‍ ഐസ് ഇടക്കൊക്കെ ഇവരുടെ കുറുകെ വരുന്നുണ്ട് . നിധി തേടിയുള്ള മൂവരുടെയും അഡ്വഞ്ചറുകള്‍ക്കിടയില്‍ ഒട്ടനേകം ഓര്‍മയില്‍ തങ്ങി നില്‍ക്കുന്ന രംഗങ്ങള്‍ ചിത്രം സമ്മാനിക്കുന്നുണ്ട് .ചിത്രത്തിന്റെ കഥയിലേക്ക് അധികം കടക്കുന്നില്ല .എന്തെന്നാല്‍ ഇത് പറഞ്ഞരിയേണ്ട ഒന്നല്ല ..അനുഭവിച്ചറിയേണ്ട ചിത്രമാണ്‌ .
ക്ലിന്റ് ഈസ്റ്റ്‌വുഡ് പതിവ് പോലെ തനതായ മാനറിസങ്ങളിലൂടെ തന്റെ റോള്‍ അനശ്വരമാക്കിയപ്പോള്‍ ലീവാന്‍ ക്ലീഫും ഏഞ്ചല്‍ ഐസ് ആയി മികച്ചു നിന്നു . എന്നാല്‍ ചിത്രത്തില്‍ ഏറ്റവും മികച്ചു നിന്നത് അഗ്ലി ആയി അല്ലെങ്കില്‍ ടുകോ ആയി അഭിനയിച്ച എലി വാല്ലച് ആണ് .പുള്ളിയുടെ ചിരിയും സംഭാഷണങ്ങളും ഭാവങ്ങളും ഒക്കെയും ആ കഥാപാത്രത്തിന്റെ മാറ്റ് കൂട്ടി .
ചിത്രം കണ്ട ഒരാള്‍ക്കും ഇതിന്റെ ക്ലൈമാക്സ്‌ ജന്മത് മറക്കാന്‍ കഴിയില്ല . 50 വര്‍ഷങ്ങള്‍ക്കിപ്പുറവും ആ ക്ലൈമാക്സ്‌ ഒരു അത്ഭുതമായി നില കൊള്ളുന്നു . ആക്ടിംഗ് ,സംവിധാനം ,ബാക്ഗ്രൌണ്ട് സ്കോര്‍ , ക്ലൈമാക്സ്‌ തുടങ്ങി എല്ലാം കൊണ്ടും മികച്ചു നില്‍ക്കുന്ന ഒരപൂര്‍വ വെസ്റ്റേണ്‍ ക്ലാസിക് .
ഞാന്‍ വീണ്ടും വീണ്ടും കാണുന്ന ചിത്രങ്ങളില്‍ ഒന്നാണ് ദി ഗുഡ് ദി ബാഡ് ആന്‍ഡ്‌ ദി അഗ്ലി . ഇതിനു ഒരു കൊറിയന്‍ റീമേക്ക് ഉണ്ട് .ഒറിജിനലിന്റെ ഏഴയലത്ത് വരില്ലെങ്കിലും കൊള്ളാവുന്ന ചിത്രം തന്നെയാണ് അതും .
ഒരു കാരണവശാലും മിസ്‌ ആക്കരുത് ഈ ചിത്രം .
IMDB: 8.9/10
RT: 97%
______________________________________________________________________
ഡോളര്‍ ട്രിളോജി യിലെ മൂന്നു ചിത്രവും കണ്ടിരിക്കെണ്ടത് തന്നെയാണ് . ട്രിളോജി എന്ന് കേട്ട് ഒന്ന് മറ്റൊന്നിന്റെ തുടര്‍ച്ചയാണെന്ന് തെറ്റിദ്ധരിക്കണ്ട . മൂന്നും തമ്മില്‍ കഥാപരമായി ഒരു ബന്ധവുമില്ല .
No comments:
Post a Comment